„Ferðalög eru mitt stærsta áhugamál og ég reyni að ferðast eins mikið og ég get“, segir Neringa Ziukaite, þjónustustjóri hjá Dögum.

Neringa er frá Litháen og hefur starfað hjá Dögum í tvö ár. Hún er mikill ferðalangur og fer gjarnan óhefðbundar leiðir í þeim efnum. Í sumar fór hún í sjálfboðaliðaferð til Kenía og Tansaníu á vegum Múltíkúltí menningarmiðstöðvar.

„Þetta var ekki venjulegt eða hefðbundið ferðalag. Ég fékk að taka þátt í góðgerðarverkefnum, vera með krökkum, planta trjám og taka þátt í ýmis konar uppbyggingu og flottum verkefnum,“ segir Neringa.

Ferðin var að hennar mati ógleymanleg og veitti góða innsýn inn í líf fólks á svæðinu.

„Við fengum að upplifa hvernig fólk lifir lífi sínu og ber sig í erfiðum aðstæðum. Að sjá hvað er í gangi þarna opnar augu manns fyrir því hvað við erum heppin með okkar daglega líf hér, og þá sérstaklega konur. Það eru mjög flott verkefni í gangi þarna og styrkir frá Íslandi sem breyta miklu fyrir fólkið“.

Fyrr á árinu fór Neringa einnig til Perú með vinkonu sinni sem er þaðan.

„Við heimsóttum fjölskylduna hennar og svo ákvað ég að lengja ferðina og ferðaðist ein í um Cusco og Lima í tíu daga sem var mikið ævintýri“.

Neringa unir sér afar vel í vinnunni á milli ferðalaga og stefnir á fleiri framandi ferðir sem víkka sjóndeildarhringinn í framtíðinni.

„Ég vil grípa öll tækifæri sem ég get í lífinu, gera eitthvað skemmtilegt og upplifa heiminn,“ segir hin lífsglaða Neringa.